Ni 5 awh India Hmarchhak state hrang hrangte tana Chess inelna lian ber, 23rd NorthEast State Chess Championship 2025 chu December ni 16th atanga 20th December 2025 chhung khan R. Dengthuama Indoor Stadium, Aizawlah neih a ni. India hmarchhak state hrang hranga Chess thiamte inelna leh inpawh tlanna atana buatsaih niin, kumtin neih thin a ni a, Mizoram hian ṭum 3 a thlenna a ni.
Chess khawmpui hi December ni 16 khan Pu Lalnghinglova Hmar, Sports Minister in e4 Opening Move chein a hawng a, inkhel chhunzawm nghal a ni a, he inelnaah hian Hmarchhak state hrang hrang 8 atangin infiammi mi 281 ten Round 9 khelin, thiam ber nih tumin an inkhel a, Naupang Kum 7 hnuailam atanga senior player, kum 60 chuang te pawh he championship-ah hian an tel a ni.
Open Category ah Tonmoy Rajbongshi kum 15 (Assam) chuan Point 8 hmuin, chak ber nihna a chang a, Champions Trophy leh Rs 1,00,000/- a dawng. Iftikar Alom Mazumdar (Assam) pahnihna niin, pathumna chu C. Lalrinsanga (Mizoram) a ni.
Championship kharna inkhawmah hian Er Lalchhuana, President MCA Chairman a ni a, Mafeli Hlawndo in zei takin inkhawm a kaihruai a, Pu Lalthansanga, Minister, EF & CC etc in Chief Guest niin a hman pui a, Northeast Chess khelthiam ten hetiang hun hlu tak kan nei thei hi lawmawm a tih thu leh infiammi kalkhawmte chu Khawvel huap pawha lang pha tur leh Grandmaster hial ni thei tura a duhsak thu a sawi a, Chief Arbiter Anupam Bhatacherjee in result puangin lawmman semna neih zui nghal a ni. State hrang hrang Chess hruaituten Mizoramin kan lo mikhual danah lawmthu an sawi mawlh mawlh e.