AICF General Body Meeting at Ahmedabad

 

General Body Meeting kal chanchin

Report :  Micky Pautu

22^nd July, 2024, Aizawl : MCA a kan hotute duhsakna azarah India ram pumpuia Chess rorelna lian General Body Meeting a tel turin min ruat ve hlauh mai a, Pu Lalruatsanga, Treasurer nen kal tura ruat kan ni a, keini bakah hian AICF a kan Jt Secretary (MCA GS ni bawk) Pu Muantea te nupa nen kan chhuak tlang hlawm a, Lengpui Airport atanga kan thlawh chhuah hnuah,Kolkata khawpuia Netaji Subhash Chandra Bose International Airport-ah kan han tum ta a, Aizawl a kan airport nen chuan a lo inthlau ta ngang mai. Terminal kan luh fel hnuah Domestic Transfer Security check kan paltlang leh a, Ahmedabad thlawhna nghakin kan thu leh thap a, Terminal kilah hian Smoking zone chhe te an siam ve a, vawi 2/3 chu kan va pan ve zak zak hnuin, Ahmedabad lamah kan inkap chhuak ve leh ta.

Ahmedabad ah hian Sardar Vallabhbhai Patel International Airport-ah kan zuk tum ve leh a, heta tang hian min lo hmuakin, car nuam takin kan thlenna tur Hotel min panpui nghal a, Ahmedabad a mi hausa rualte tualchaina hmun Karnavatti Club-ah min thlen tirin, parthi nen min lo hmuak a, Room nuam tak min pe a, ei  leh in pawh room atangin kan lam a, engkim mai a nuam em em mai a, zanriah ei hmain Outdoor meeting an rawt avangin rei vaklo kan meeting a, room-ah letin zanriah kan ei hnu ah Meeting kan han nei leh lawp lawp a, chumi hnuah inbual faiin kan mu ta siai siai a.

 A tuk ni 23 hian hunawl kan neih avangin chawhnu lamah Ahmedabad khawchhunga Gandhi Ashram leh Kankaria Lake te tlawh turin kan chhuak a, kan chhuahna ah hian Motor leh driver min pe a, Ahmedabad khawpui fanna hun tlem kan neih ah an hmun chhuanvawr fanna hun kan nei a,  a tuk ni 24 hi Meeting kan neih ni tur a ni a, amaherawhchu meeting hi dar 2 a neih tur a nih avangin chawhma lamah Pu Maruata nen Bazar lama teihawiin kan chhuak a, han lei em em tur pawh hre lovin kan va vak rawlai kual vel mai  mai a, Uber Rickshaw hmangin kan tei kual vel deuh mai mai. Kan haw phei hnuah Meeting turin kan insiam a, Meeting Hall-ah Lunch an lo siam rup mai a, ei leh in lamte kan tih zawh hnuin GB Meeting kan nei ta a ni.

GB Meeting-ah hian AICF a kan hruaitute an lo kim tha khepkhawp hle a, meeting hi President Nitin Narang, Haryana mi in min kaihruai a, Secretary hi Gujarat mi, naupangte mai Dev Patel a ni a, Treasurer hi kan lo hmelhriat sa tak Dharmendra Kumar, Bihar a ni thung. Meeting-ah hian Gujarat kan thlen atanga an puipa ber Ajay Patel te, kum kalta lama President chhuak ta Dr Sanjay Kapoor te, AICF Interim Secretary chhuak ta AK Verma te, AICF hruaitu hlun ber mai BS Chauhan te, Grandmaster lar GM Kunte, GM D. Baruah te leh mi langsar tak tak an tel nawk hlawm a, meeting-ah hian thurel hmasa pawmpui chungchang te, kum kal ta lama Audited Statement chungchangte leh tul pawimawh hrang hrangte kan rel zui nghal a ni. Kumin hian AICF hian hruaitu thar kan nei a, AICF lam inepna boruak a lian alh alh khawp mai a, henglai a hmaichhana han inchhal rap rap kan hreh ang kha an nei ve vak lemlo a, hmaichhanah an ri riap riap mai a ni.

AICF ah hian kan thlanchhuah Office Bearers ni sa te bakah Secretary hian A.K Verma chu CEO atan a ruat thar a, hemi chungchang hi kan khel nat ber tur pakhat a kan ngaih a nih laiin, sum lam chungchangah na taka kan inhnial buai tak avangin sawina hun mumal kan nei ta lo a, kan tifel ni maiah kan ngai a, a pui ber pakhat chu AICF sum hman dan chungchang Auditted Statement thehluh theih lawk loh an rawn pharh a, sum hman dan hrang hrangah thil fel tawklo a inpuhna a na hle a, amaherawhchu rel tur dang hrang hrang National Championhip chungchangte, Northeast  Championship a sum pek chungchangte, 45th Olympiad a selection chungchangte, AICFB(Blind) ho atanga rawtna lut chungchangte kan khel hlawm bawk. 

Meeting-ah hian kan President hian English in han sawi hawng sateh thin mahse, India ram a rorelna a nih angin Hindi deuh vek an hmang hlawm a, keini Hindi thiam vaklo tan chuan an sawi zawng zawng kan hriat loh mai bakah thusawi ve a harsa khawp mai. National level a thlengsang tur chuan eng kawngah pawh tawng a harsatna neilo a pawimawh zia kan zuk hrechiang lehzual a, amaherawhchu mi chi hrang hrang, hnam hrang hrang kan ni a, engemawchenah chuan a zuk tal ve naw naw theih zel e. 

Ni 25 a lo ni a, ruahhman lawk ang chuan kan haw hun tur a ni tawh a, amaherawhchu GSCA lam ten ruahhmanna min lo siam angin, Sardar Vallabhbhai Patel lim en turin ruahhmanna kan insiam ta thung a, zing chaw ei hmain kan thlenna kawtah AC Deluxe Bus a lo ding vang mai a, kan inpeih fel a kan chhuah meuh chuan Dar 9 a ri thuak a, kan kalna hi a hlat tham avangin, darker 4 chuang Bus hian kan tlan a, Bus hi AC niin, thutna tinah hian USB port (Phone Charge-na) a awm nghal a, kawnglakah hian zunram thiar leh thil eina hunte kan nei kawi zawk a, dar 2 dawnah kan thlenna tura an ruahhman Sahakar Bhavan kan thleng phei a, helai hmun hi India mi hausa rualte tualchaina hmun a nih avangin Room leh engkim hi a nuam em em vek mai a ni. Kan thlenna hmun Kevadia khua atang hian Statue of Unity hi 8 kms vel a hla a ni.

Kan bungruate kan indah fel hnuin, muangmarin Statue of Unity pan hian kan chhuak ta a, Guide 2 min pe a, anni hruaina hnuaiah hian Unity hmun leh a chhehvel te kan fangkual ta a ni. Kan hmun tlawh langsar deuh deuhte han sawi thuak thuak ila.

Sarovar Dam : He hmun hi helai lui lian Narmada an khuah atanga kawlphetha an siamchhuahna hmunpui a ni a, helai hmun atang hian kawlphetha 1200 MW zet an siam chhuak a ni. Kawlphetha siamchhuanhna hmun hi leihnuaiah siam a ni a, he powerhouse hi mi nazawng kal leh thlalak phal a nilo a, leihnuai thuk takah Powerhouse lian tak mai bunin, mi engemawzatin hna an thawk vut vut reng a, leihnuai kawng ah hian motor pawh kan inpel zur zur thei a ni. Heta tanga kawlphetha an siamchhuah hi Madhya Pradesh, Mahatrashtra leh Gujarat ten an insem a ni. He tui khuap tur hian Kum 1946 atanga bul tan kha a ni a, he tuikhuah hmang hian India ram hmun hrang hrangah kawlphetha mai bakah tui lakna hrang hrang siam a ni a, tuilian avanga harsatna engemawchen a sutkian phah a ngaih a ni bawk.  Sardar Sarovar dam hi ft 3970 a sei niin, ft 535 a sang a siam a ni a, tui hi 455 ft a sang khuap tura siam a ni a, he tuikhuah avang hian Madhya Pradesh khaw 178, Maharashtra khaw 33 leh Gujarat khaw 19 te a chim (affected) a ni. He tuikhuah atanga tuilakna Narmada Main Canal hi khawvela tuilakna thu ber niin 458 kms laia thuiah lui lak a ni a, Rajasthan  a Barmer leh jhalore a thlaler hmun thlengin huna siamna tlak a tuilakna siam a ni. Tui thianghlim intur lakna atan hman a ni bawk a, he tuikhuah atang hian mihring 30 million zetin tui intur hnianghnar an neih theih bawk a ngaih a ni.

 Jungle Safari: He lai hmun tlawhtu te tana hun nuam tak hmanna tur hian kum 2019 atang khan sahuan lian tak mai an siam a, he sahuan hi 375 acres zeta zau niin, ke a fan kual ralah chuan fan fe tham a ni a, a chhungah hian a thlawna chuan theih turin Safari bus an tlan tir reng a, ramsa chi hrang hrang, sava chi hrang hrang leh laiking lam chi chi hrang hrangte hmuh tur an awm a, Giraffe, Rhino, Hippotatamus, Sakei chi hrang hrang te, Chimpanzee, sava lian chi leh vaki lam te, sa chi hrang hrang engemawzat a awm a ni. Sardar Patel Zoological Park ep mai ah hian Unity Glow Garden a awm a, he hmunah hian pangpar leh phul mawi tak tak te, Maize Garden te a awm bawk a ni.

 Statue of Unity:  Khawvela Statue sang ber Statue of Unity hi India ram Deputy Prime Minister hmasa ber, Vallabhbhai Patel a lim a ni a, 182 mts a sang niin, kum 2018 khan peih fel a ni. He milim hi concrete structure niin, a kawrah hian Bronze hman a ni a, a milim hi  182mts kan tih rual rualin, a bul thut atang a a vaia teh chuan 240 mts a sang a ni a, a milim san zawng 182 hi chu Gujarat a Legislative Assembly seat awm zat mil a siam a ni.  He milim siam nan hian thla 57 (Kum 5 dawn) hman a ni a,  km 7 vel a hla atang pawhin hmuh theih a ni. He statue hi zone 5 ah then a ni a, zone 3 hi mipui tlawh theih a siam a ni. Zone hmasa berah chuan a innghahna leh a chhehvel huan te, khawthlirna hmunte a awm a, lui ralah hian Hollywood style in Statue of Unity tih tar a ni bawk. Zone 2 ah hian a khup chin hnuailam hi a ni a, A lim dinna hnuaiah hian exhibition area a awm a, Patel-a lu lem leh museum te awm a ni. Zone 3 ah hian 153 mts a sang khawthlirna a awm a, helai thleng hi mipui tlawh theih a siam a ni a, Zone 4 na hi Maintenance area niin, zone 5 hi a dar leh lu innghahna lai vel a ni tawh a, kal phal a ni tawhlo thung.

Statue tlawh turte hi ei leh in leh thildang pailuh phalloh engemawzat a awm a, security check paltlng hnuah chauh tlawh theih a ni a, thlalak pui tur hmun hrang hrang a awm a, kum upa tan electric vehicle a awm bawk. Dar 8 vel atangin Laser show neih thin a ni a, statue entu te nghahhlelh ber pakhat a ni thin a ni.

Heng kan sawi hmun nuam tak takte hi Chess avangin a thlawn liau liauin kan tlawhin kan kal ve thei hi ka va lawm tak em! Kan tlawh satliah mai nilovin VIP programme ang main kan nuamsa lehnghal.

Statue of Unitu kan fan hnu hian Bus in kan thlenna Hotel lamah kan let leh a, dinner te kan ei hnuin, mahni room lamah hahdam turin kan let hlawm a.

A tuk ni 26 a lo ni a, zing tak maiah dar 6 velah breakfast kan ei sawk sawk a, Ahmedabad lam kan pan leh ta, khawpui laili a GSC Bank Headquarter hmunah min thlen tir leh a, heta tang hian bazar ilo a awlsam a, tlaiah Ahmedabad bazar lian tak mai, Lal Darwaja leh Teen Darwaja hmun velah kan va teikual a, duhtawkin kan va bazar a, thil man tlawm atanga a to thlengin a chikim hle.

A tuk a lo ni a, zingah hma takah Mizoram lam pan turin Sardar Patel International Airport lamah kan Meghalaya unaute nen kan chhuak phei a, thlawhna hrang a chuang tur kan nih avangin thla te kan lakho hnuin kan inthen ta a, tluang taka rawn thlawk chho in, Kolkata ah thlawhna kan thlak zawk a, chawhnu dar 2:30 vel khan Aizawl kan rawn let leh ta a ni.

~~~~