Chess game-ah hian dik leh fel taka game kalpui a nih theih nana inkhel thununtu (referee/umpire/judge ang hi) Arbiter an awm ṭhin a, Arbiter hi chi 4 an awm a:
1. International Arbiter (IA),
2. FIDE Arbiter (FA),
3. Senior National Arbiter (SNA),
4. National Arbiter (NA).
Nimin (05.02.2022)-a Result tihchhuahah Mizoram atangin All India Chess Federation (AICF) Project 'Chess for Everyone' hnuaiah Pu Micky Lalmuanpuia Pautu, ITI Veng, Pu C. Chhawntluanga (Bawihpuia Pa), Dinthar leh Pu Ramdinthara, Kawrte te chuan National Arbiter exam an pass.
All India Chess Federation chuan India rama chess a lo ṭhan/lar deuh deuh theih nan theihtawp a chhuah mek a, Chess in School te, Chess for Everyone te leh project dang dang a kalpui (mek) a. Tunah hian Chess for Everyone Project hnuaiah Arbiter ṭhahnem zawk chher chhuah an nih theih nan Arbiter Seminar chu Online-in (Zoom kaltlangin) a buatsaih ta a ni. Zing lamah 8:00AM-11:00AM, tlai lamah 5:00PM-8:00PM, ni 5 chhung (darkar 30) lecture/zirtirna an dawn hnuah practical exam (pairing software operate dan) an nei a, a hnuah Dt. 30.01.2022, 3:00PM - 6:00PM (3hrs) khan theory exam nei lehin Mizoram aṭangin heng mi pathum te hian an pass ta a ni.
Theory leh Practical Exam-a an tih ṭhat dan a zirin candidate-te hi Grade A, B, C leh D-ahte an pass a, Grade A&B hian Senior National Arbiter tlingin Grade C&D te chu National Arbiter-a tling tur an ni a. Mizoram aṭanga Exam zingah Pu Micky-a leh Bawihpuia Pa te chu Grade 'B'-ah pass-in Pu Ramdina chu Grade C-ah a pass a, SNA pahnih leh NA pakhat kan neih belh ta a. Heti hian Pu Micky-a leh Bawihpuia Pa te hian FIDE (Fédération Internationale des Échecs/ International Chess Federation) rated Tournament-ah arbiter-ah an ṭang thei ta tihna a ni a, Pu Ramdina hi MCA leh District Chess Association hriatpui Tournament-ah te leh Local Tournament angahte dan ang thlapin Arbiter ni turin a tling ta bawk tihna a ni.
Arbiter Training/Exam hi neih reng reng a ni ngai lo va, neih a nih chang pawhin training leh exam attend/attempt tura Mizoram aṭanga zu kal a harsa ṭhin bawk. Tun hma deuh khan SNA hi 2 kan nei ve ngar ngar ṭhin a, anni hi eizawnna hna lama an buai ṭhin avangin Chess Tournament neih a nih changin an hmanhlel tak zet ṭhin. He indaih lohna hi hmuin Mizoram Chess Association chuan Arbiter kan neih belh theih nan ṭan a la a, kum 2016 khan kan khawtual (Aizawl) ngeiah AICF chuan Arbiter Exam min rawn buatsaihsak a, hemi ṭum hian SNA pass mi 10 kan neih belh a ni. Amaherawhchu Arbiter nih hi a awlai lo va, exam-a han pass hnu hian active zui a ngaiin thil tih neuh neuh tur a awm reng ṭhin; tih tur ṭul an tikim lo a nih chuan an license a thi ṭhin a ni. Chuvâng chuan, tun dinhmunah hian Mizo Chess chuan active SNA (FA ni mai thei tur) Pu Lalṭhazama, Tuikhuahtlang tih loh chu Arbiter line-ah hian mi a nei lo tih ngam a ni. Hetih mek laia SNA pahnih leh NA pakhat neih belh hi Mizo Chess tan chuan chanchin lawmawm tak a ni awm e.
Arbiter tling thar mi 3-te hi active zuiin theihtawp chhuahin Mizo Chess tan han ṭang se, Mizo Chess hi hmasawnna rahbi khat tal kaipui thei se a duhawm ngawt mai.