By Bawihpuia Pa
Chess Game hi zankhat thilthua thiam viau theih a ni lova, thiam tak tak tur chuan hun a duh rei hle. Mi thluak tha chungchuang takte pawh hian, thiam tak tak (master level chin) han ni tur chuan 8000 hrs (kum khat vel) tal an mamawh niin mithiamte chuan an sawi. Chuvangin mi pangai phei chuan kum 4/5 kan mamawh ngei ang tih hi hriat tur a ni.
Hei tak hi Mizote peih loh zawng, tih theih loh zawng tak mai a ni a. A hnam pum ang zawnga thlirin, hlawhtling tur khawpa teirei/beih fat fat lam hi kan tih theih loh zawng tak mai a ni. "Mizo thluak a tha" kan ti thin chungin leh he game-ah hian tui tak tak leh khel peih tak tak kan awm ve ta nual chung pawha (National 'A' chu sawi loh) National 'B' Championship-ah pawh eng ruai kan la an theih loh chhan chu hei chiah hi a ni!
Tha thlah lovin kan zir ang a, beidawng lovin kan bei zel tur a ni. Tun atanga kum 4/5-ah hian Mizo, 2300+ FIDE rated player han kai kan neih theihna turin "Tum" nei ranin i han inzir dawn ang hmiang.
Hlawhtling tura pawimawh nia an sawi "Three D's" te hian he post hi kan tlip a nge.......
1. Direction - Hlawhtling tur chuan kawng dik i zawh a ngai. Chess thiam tak ni turin engtiangin nge beih/zir tur tih hi he blog-ah hian sawi chho zel kan tum dawn a ni.
2. Determination - I tum kha a ruh tawk em? Harsatna tam tak paltlang tur a awm dawn a, beidawn rum rum chang leh bansan duh chang pawh i ngah ang. Chess thiam tak tak han ni tur hian i tum a ruh tawk em?
3. Discipline - Sipai ho chuan hei hi an harsat lova, sipai lo hian kan harsat thin. Hei chu kan hrethiam thovin ka hria ka duhtawk phawt ang e. A thui deuh ta e....
Mizo Chess players, thiam tak tak duha zir ten kan tih sual tam ber chu Hriatna awmze nei lo kan chawlut nasa lutuk hi a ni. Lehkhabu (chess bu) kan chhiar a, kan zir a, kan hre teuh a, kan game erawhin hma a sawn lem si lo. GM Magnus Carlsen hian GM dang, a kum let 2 hiala upa te ai hian a hriat tam kan ring em? A hre tam zawkin a tawng tam zawk hauh lovang mahse, tunah hian rating sang ber dinhmun a luah thei tlat si. Hei hi a chhan ber chu Chess thiam tak tak tur hian hriat tam hi a pawimawh ber lova, kan hriat ang te hman tangkai thiam hi a pawimawh ber zawk vang a ni. Lehkhabu pakhat rang taka chhiar a, a then a zar hriat/theihnghilh a, a dang chhiar leha a hma ang bawka hre nial nuala, lehkhabu danga kal leh ang chi hi kan tihsual thin chu a ni. GM te hian a tlangpuiin lehkhabu hi an chhiar puat ngai lova, uluk takin an zir thin. GM pakhat phei chuan lehkhabu 1 chhiar nan kum 3 lai a hmang an tih chu!!! Kum 3 hnuah a rating point 100-in a san belh a, tunah hian 2600 chunglamah a awm mek. Lehkhabu kan chhiarin, enge min zirtir a tum, engtiangin nge hma ka sawn pui ang tih ngaihtuah ranin leh hriatchhuah/zirchhuah ngei tumin i zir thin ang u.
It is much better to read one book and deeply understand it
than to read twenty books with only superficial understanding
BUL KA TAN DAN
Chess khel thiam tak ni tura pawimawh hmasa nia ka hriat chu "NGAIHTUAH DAN' hi a ni a, Mizo zingah pawh kum 20/30 chess game lo khel tawh mahse 2000 FIDE rating hnuailama la awm tlat kan awm nual a, 2000+ FIDE rating hi kan awm mang lo zawk a ni (Internet atanga ka hmuhphak chin ka han dap chuan, Lalbiakzauva leh Thangchungnunga bak 2000+ kan nei lo!). Heng kan senior players tam tak (below 2000)-te hian game an khelh hnemna atang ringawt pawh hian (training dang tel miah lo pawhin) an ngaihtuahdan kalhmang dik ni se, hei aia sang hi han thleng thei turah ka ngai a. Chuvangin ngaihtuahdan kalhmang dik, GM leh IM hoten an hman tlanglawn ang hi hriat ve a, zir a, hman ve ka tum a, chiar tur, zir tur, en tur, ka zawng ta chiam mai a ni.
Chuan, heng lehkhabute hi ka chhiar a:
1. Think like a grandmaster - A.Kotov2. How to reassess your chess - Jeremy Silman3. Improve your chess now! - Jonathan Tisdall4. Attack and Defense - Mark Dvoretsky
Heng lehkhabute hi ka zir fe hnuah pawh hma ka sawn thei lo hle mai, chess ka tuina tlahniam khawpin a har ka ti. Lehkhabua an sawi ang ka game-a apply ka tum hian ka thei mang tlat thin lo a ni.
Tags:
Tournament